Sugod karong adlaw'ng Lunes magsugod na ang gimbuhaton sa Sulpicio action center gikan alas 8 sa buntag ug manirado hangtud sa alas 5 sa hapon samtang gimando usab nga papaulion nalang ang mga tagtungod nga taga probinsya sa Sugbu.
Kini maoy gipahibalo ni Vice Mayor Michael Rama sa mga tagtungod sa mga na-missing ug namatay sa nalunod nga barkong MV Princess of the Stars.
Matud pang Rama nga kinahanglang mahimong usa ka “one stop shop” ang action center gumikan kay karong wala na tuguti ang mga kabanay nga makatan-aw sa mga patay wala nay rason para sila mopundo og dugay sa action center.
Kadto nalang mohikay sa mga papeles aron makuha ang ilang claims ug uban pang transaksyon mahitungod niini maoy buhaton diha sa maong dapit.
Sa pagkakaron problema pa sa action center ang mga kabanay'ng gikan sa Negros, Mindanao ug Luzon gumikan kay ang pipila kanila diha na magpundo sa tibuok adlaw ingon man sa kagabhion.
Samtang ang uban gustong masigurong mahuman nila ang mga dokumentos nga rekisitos aron makakuha og claims.
Ang Kapitolyo misaad na nga tabangan ang tanang konstituwente niini ug miawhag kanila nga papaulion nalang sanglit ang ilang mga lokal nga DSWD mao nay motabang sa ilang claims.
Ang Sulpicio Lines misaad og P200,000 matag usa sa casualties, samtang si Presidente Gloria Macapagal Arroyo mihatag og P10,000 sa tanang nabiktima ug duna say gitanyag ang dakbayan sa Sugbu alang sa mga konstituwente niini.