‘Stars’ Update: 2nd batch sa mga patay mangabot

Gikatakdang mangabot karong adlawa ang ikaduhang batch sa mga patay’ng lawas nga gikan sa Romblon nga gikan sa nagkalain-laing mga isla sa palibot niini.

Sa gipadalang text message sa Banat News ni Bernard Ryan Go, Vice President for Deck Maintenance sa Sulpicio Lines mitug-an nga dunay 99 ka mga patay ang moabot karong adlawa.

Ang maong mga lawas gikarga sa MV Cagayan Princess gikan sa Pasacao Port sa Camarines Sur human sa paglibot sa nagkadaiyang mga dapit sa Southern Tagalog.

Pipila sa maong mga patay’ng lawas gikan sa MV Cebu Princess nga milibot gihapon sa maong dapit aron pagkuha sa mga patay.

Sumala pa nga ang pipila niining mga patay mao kadtong mga gipanglubong na sa mga residenteng nakakita kanila gumikan kay pulos na kini nagsugod og kadugta.

Ang Sulpicio Lines mipadala nang daan og retrieval team pinanguluhan ni James Go inubanan sa mga sakop sa National Bureau of Investigation ug mga lokal nga opisyal sa Panacao aron kubkubon ang tanang mga na-report nga mga patay’ng gipanglubong diha sa maong mga isla.

Ang mga kabanay sa mga biktima nabalakang di na nila igkita bisan patay’ng lawas sa ilang mga mahal sa kinabuhi human makadawat og report nga duna nay mga gipanglubong nga nangapadpad nga patay’ng              lawas.

Ang MV Cebu Princess gikan pa sa lungsod sa San Pascual sa Burias Island ug mikuha sa mga patay’ng gipanglubong na didto ug giusa sa umaabot nga mga patay karong adlawa.

Samtang si Romie Ng ang branch manager sa Cosmopolitan Funeral Homes nga maoy gibutangan sa mga patay karon nagkanayon nga andam na sila sa pagdawat sa sunod nga batch.

Mipasalig kining di na mahitabo ang susamang kahasol nga namugna sa milabay’ng semana sa nangalisbong baho tungod kay idiretso na nila kini og sulod sa mga lungon ug ipatong-patong aron di na magpasad ug di na usab moalisbo.