Gigulgol ang liog sa usa ka minor de edad nga mahuyang dayon gipaanod sa sapa kagahapon sa kaadlawon diha sa Sitio Cabarang barangay Sapangdaku, ning dakbayan.
Ang biktima giila sa kapolisan nga si Christian Gabutan Labra, 13, usa ka first year high school nga taga Sitio Arcos, sa nahisgutang barangay samtang ang akusado mao si Ruben Racaza Janubas, 26, konduktor sa PUJ, taga Sitio Cabarang sa nahisgutang barangay.
Base sa report nila ni SPO4 Alex Dacua ug mga kaubanan sa Homicide Section sa Cebu City Police Office ang biktima padulong na mopauli gikan sa disko dili layo sa ilang lugar mga alas 3:30 sa kaadlawon kagahapon uban sa duha ka minor de edad nga silingan nga sila si Norile Bacalan, 16, ug Gerald Gacayan, 14, dihang gisundan ni Janubas.
Si Bacalan ug Gacayan mitug-an sa mga imbestigador sa Homicide Section nga samtang naglakaw sila sa dalan, si Janubas nga nagsunod kalit lang mihawid sa abaga sa namatay ug gibunlot paingon sa ubos nga bahin sa sapa sa maong lugar.
Sa kalisang nila ni Bacalan ug Gacayan, nanagan kini pahilayo sa lugar aron malikay sa peligro, apan pagka-alas 5:15 sa buntag ilang gibalik ang lugar ug gipangita ang biktima.
Sa dihang ilang nakit-an si Janubas nga nagkadugo na ang sinena niini samtang nakit-an si usab nila ang hubo nga lawas sa biktima diha sa sapa nga nagbuy-od nga wala nay kinabuhi.
Si Janubas nasikop lang usab kini gilayon sa mga miresponding polis human sa hitabo dihang positibong giila sa mga bata. Apan gipatambalan kini sa Cebu City Medical Center gumikan kay nakaangkon usab kini og samad.
Samtang si PO1 Melvin Jimenez sa Guadalupe Police Station nga gikahinabi sa Banat News mitug-an nga base sa report sa iyang mga kauban nga sila si SPO2 Jaime Toring ug PO2 Dennis Labra, ang biktima aduna kini samad ginulgolan sa iyang liog ug gipaanod ngadto sa sapa.Dili hinuon makaseguro ang kapolisan kun ang biktima gilugos ba ni Janubas.(Guam P. Logroño)