Nagtingkagol karon sa Talisay City jail ang usa ka uyoan dihang naabtan kini sa akto sa kapolisan nga nagwara-wara sa iyang samurai batok sa iyang mga pag-umangkon niadtong Biyernes sa gabii sa sitio Mananga II, barangay Tabunok, dakbayan sa Talisay.
Ang suspetsado giila sa mga polis nga si Rudy Awa, hingkod ug molupyo sa maong lugar samtang ang biktima mao sila si Jocelyn Palaban ug ang iyang bana.
Matud pa sa kapolisan sa Talisay Police Station nga ang mga biktima kinsa puwerting lisanga nanawag sa ilang buhatan ug nagpakitabang ug gumikan sa daling pagresponde nila sa maong alarma, naabtan nila ang suspetsado sa akto nga nagwarawara sa iyang samurai atubangan sa balay sa mga biktima.
Sila si PO3 Arnold Damasco ug PO2 Alan Villazurda nga maoy miresponde nagkanayon nga wala makaikyas ang suspetsado kinsa hubog kaayo ug mihulga nga pamatyon niya ang magtiayon kun mogawas kini sa ilang balay.
Si Damasco sa pakighinabi sa Banat News miingon nga isog kaayo ang suspetsado hinungdan nga napugos sila sa pagtion og armas niini hangtod nga gibutang ang iyang samurai sa yuta .
Matud ni Damasco nga base sa mga silingan nga nakasaksi sa maong hitabo, si Awa giingong manghagis gyud kun mahubog ug maoy rumbohon niini ang iyang mga paryente.
Nasakmit sa mga polis ang samurai nga duhay suwab ni Awa nga may gitas-on nga 21 pulgadas.
Matud pa sa kapolisan nga ila kining pasakaan og kaso ug ang mahimong ebidensya mao ang makamatay nga hinagiban nga nasakmit nila gikan kang Awa.