Duha ka barko diriyot magbangga

Diriyot nahisusama sa kapalaran sa MV Princess of the Stars ang nahitabo sa duha ka barko dihang silang duha nagkabag-id diha sa kadagatan sa utlanan sa lungsod sa Liloan ug dakbayan sa Danao kagahapon sa kaadlawon.

Hinuon walay nasakitan o namatay sa maong insidente gawas lang nga nakapalisang sa mga pasaherong nahigmata sa maong insidente.

Matud pa ni Coast Guard Station-Cebu Commander  Elpidio Gunio sa pakighinabi sa Banat News mga ala 1:20 kagahapon sa kaadlawon nahitabo ang panagbag-id tali sa M/V Wonderful Star sa Roble Shipping Lines ug MCC Zulu nga usa ka international cargo vessel gikan pa sa Manila.

Ang MV Wonderful Star nga may gibug-atong 1,200 gross tons may dalang 607 ka pasahero ug 78 ka mga tripulante padulong sa Ormoc City samtang ang MCC  Zulu may gibug-atong 9,999 gross tonnage ug may 18 ka tripulante ug puno og container vans padulong usab sa Cebu International Port sa Cebu City.

Sumala pang Gunio ang duha ka barko wala magkadungganay sa ilang mga radyo sanglit gikatahong ang mga kapitan gikatahong mi-radyo na silang daan sa usag usa kabahin sa ilang pre-plotted course nga posibleng magkabanggaay gyud.

“Nagtatawagan na daw sila sa radio pero di yata nagkakarinigan, we will determine pa ang caused bakit nagkaganun,” sumala pang Gunio.

Dihang wala gyud mokihol ang isig ka barko, gikatahong gimaniobra nalang sa cargo vessel paglihay ang gikasugat nga pasaheroan apan naabtan pa gihapon sa tuong bahin sa kilid niini ang walang bahin sa lubot sa gikasugat.

Wala hinuon makaangkon og grabeng kadaut ang duha ka barko gawas lang sa pagkalumping sa ilang mga kilid apan gikatahong nakapalisang kini sa mga pasahero ug tripulante.

“Maliit lang naman ang damage at di makakaapekto sa seaworthiness nung barko,”  pamahayag pa ni Gunio.                                  

Tungod sa pagsaghiray napugos paghunong ang duha ka barko ug dihang nasiguro ni Capt. Joseph Andrew Lape nga walay grabeng kadaut sa iyang habig nidesider kining mopadayon sa ilang biyahe ug luwas nga miabot sa Ormoc City alas 5:20 kagahapon sa buntag samtang luwas usab nga miabot sa CIP ang MCC Zulu.

Ang mga opisyal sa maong mga barko gikatakdang paatubangon alang sa imbestigasyon sa Board of Marine Inquiry ug pasumiteron og marine protest sumala pang Gunio.