Drainage plan sa Talisay andam na

Gibutyag kagahapon sa hepe sa City Planning Development Coordinator (CPDC) Christine Homez nga padayon pa silang nagpahigayon og survey ug pagkuha og mga datus sa kondisyon sa dakbayan sa Talisay  kay sila maoy gitahasan nga mogama sa plano sa Master Drainage Plan sa siyudad.

Matud ni Homez nga ang Spaces System(SS) 4719 consultancy nga maoy gitahasan ning maong gimbuhaton gihatagan lang og unom ka buwan sa pag-survey sa tibook Talisay apan posibleng dili kini makahuman  tungod sa pag-uwan-uwan.

Matud sa hepe sa CPDC nga niadtong Pebrero niining tuiga nagsugod na sa survey ang nahisgutang consultancy firm  nga gigahinan sa dakbayan og P5 milyones aron mahingpit nila ang master plan.

Si Homez nagkanayon nga ang kinatibuk-ang proyekto  nagkinahanglan og P150 milyones nga budget kay gihimo sa “phase by phase” ang pagtrabaho niini.

Ang SS  ug ang dakbayan ang nakig-ayuda usab sa mga kapitan sa barangay aron masuta kung asang dapita ang apektado kaayo sa baha.

Usa usab sa ilang gilantaw nga problema nga makaapektar sa proyekto mao ang humok nga yuta sa siyudad ug ang ka kuyaw sa pagdahili niini.