Nagtingkagol karon sa prisohan sa Talisay City ang sakop sa Alpa Kappa Rho (Akrho) ug ang kauban niini dihang nasakpan sa kapolisan sa akto nga migabas sa haligi sa traffic signage duol sa skywalk sa barangay Bulacao, Talisay City.
Ang mga suspetsado mao sila si Aster Lapinid alyas “Tor”, 22-anyos residente sa maong lugar kinsa miangkon nga usa siya ka miyembro sa Akhro ug Michael Abellana, 21, nga iyang silingan.
Si Inspector Jaime Santillan sa Talisay City police station mibutyag sa Banat News nga uban niya sila si PO1 Glenn Aranas, PO1 John Ricafort ug PO1 Jun Dio nga nagpahigayon og roving sa mga lugar sa dakbayan niadtong Miyerkules sa gabii.
Pag-abot nila sa nahisgutang lugar ilang nakit-an sila si Lapinid ug Abellana nga naggabas sa haligi sa signage hinungdan nga ila kining gisikop.
Nabawi sa mga polis gikan sa mga suspetsado ang usa ka gabas sa puthaw ug ang poste nga gigabas.
Si Santillan midugang nga pasakaan nila og kasong “theft” sila si Abellana ug Lapinid.