Wala ikapatuman sa Police Regional Office (PRO-7) ang 10% nga pagpakibra sa gahin nila nga gasolina nga gimando ni Presidente Gloria Macapagal Arroyo ngadto sa tanang mga ahensya sa gobiyerno.
Kini maoy gipatin-aw sa mga opisyal sa kapolisan sa rehiyon -7 sa gipahigayong Talakayan sa Isyung Police nga nagtuki sa isyu kabahin sa kampanya sa gobiyerno sa pagdaginot sa gasolina.
Si Supt. Paquito Belandres hepe sa Regional Logistics Department mitataw nga sukad imando ni Presidente Arroyo ang 10% fuel cut wa gyud kini mapatuman sa PRO-7 ingon man sa probinsiya sa Sugbu.
Apan bisan kun wala kini maimplementar dili gihapon maapektuhan ang operasyon sa PNP tungod kay ang mga mayor sa kalungsoran sa rehiyon migahin kini og 50 ka litros nga gasolina para sa ilang kapolisan.
Samtang si Cebu City Police Office chief Patrocinio Comendador mipadayag nga iyang ibalik ang “bicycle cop” sa kadalanan apan ang nakababag mao ang kakuwang sa besikleta sa ubang mga polis.
Hinuon ang kagamhanang lokal sa dakbayan sa Sugbu mihimo na usab og mga lakang kalabot niini ug nagpaabot og donasyon gikan sa pribadong sektor.