Taga-COA gitulis

Empleyada sa Commission on Audit (COA) nga igsuon og polis gitulis sa duha ka lalaki nga nagsakay og motorsiklo niadtong Miyerkules sa kaadlawon sa barangay Cogon West, lungsod sa Carmen.

Si Rhoda Morales, 39, dalaga, nagpuyo sa sitio Baryo Pikas, barangay Luyang, Carmen, nag-atang og masakyan paingon sa iyang trabaho sa COA Cebu City sa dihang gibabagan sa duha ka tulisan nga nagmotorsiklo.

Gitiunan og armas si Morales sa nag-angkas dayong labnot sa iyang bag nga adunay sulod nga cellphone, kuwarta nga P800, mga importanteng kagamitan ug ID.

Ang igsuon ni Morales nga si PO1 Romano Morales sa Carmen, kauban silang PO3 Ruel Villamor ug PO3 Alex Perez misulay og gukod sa mga tulisan, apan wala na maabti. – Darrel Carumba