Ang director general sa Philippine Economic Zone Authority kagahapon nagkanayon atol sa Mactan Development Forum sa Mactan Island Chamber of Commerce and Industry nga salawayon ang buhat sa mga lokal nga kagamhanan nga padayong mopiit sa mga negosyante.
Sumala pa ni Lilia de Lima nga ang pagpang-harass sa mga lokal nga opisyal sa mga investor maoy hinungdan nga mangatras ang mga negosyante pagbubo og puhonan.
Didto sa maong forum si MICCI president Efrain Pelaez Jr., apan wala matingoga ang mga dinapit niini nga gikan sa dakbayan sa Lapulapu sama nila ni Bise Mayor Mario Amores ug Atty. Michael Dignos.
Apan si Atty. Teodulo Ybañez mihimakak nga ilang gilisudlisod ang mga negosyante sa Lapulapu. Ebidensiya niini ang pagkahimutang sa ikaduhang dapit sa dakbayan sa Lapulapu nga “business-friendly” sa tibuok nasud.
Matud pa ni Ybañez nga ang total investment sa Lapulapu sa milabay’ng tuig 2007 miabot og P4.7 bilyones nga matud niya dakong timailhan nga adunay daghang mga negosyante nga gustong mobubo og puhonan sa dakbayan sa Lapulapu, sukwahi sa mga pasangil sa kampo ni Pelaez nga ila kining gilisudlisod.
Si Pelaez gikiha ngadto sa Office of the Ombudsman-Visayas sa mga opisyal ug mga sakop sa Association of Barangay Council sa Lapulapu tungod sa pagpang-harass niini ngadto kanila ginamit ang pagka-accredited sa MICCI isip anti-graft watch unit.
Si Deputy Ombudsman for Visayas Pelagio Apostol miingon nga ilang imbestigahon ang padayong paggamit ni Pelaez sa logo sa Ombudsman alang sa personal niini nga katuyoan.