Mga squatter sa Mambaling papahawaon

Posibleng mapahawa sa ilang gipuy-an ang mga mulopyo diha sa sitio delos Reyes ug sitio Mangga sa barangay Mambaling nga pabiling nag-antos sa napundong tubig.

Kini kung dayonon sa tag-iya sa maong luna nga si Vincent Go ang plano niining pagsang-at og reklamo ngadto sa hukmanan pagpapahawa sa mga molupyo.

Ang mga residente sa nahisgutang duha ka sitio una nang nangreklamo tungod sa napundong tubig diha sa ilang dapit.

Naalarma ang mga opisyal sa siyudad human masayod sa maong sitwasyon ilabi na nga ang kabataan gitaptan na og mga sakit sa panit.

Kini gihimoan gilayon og aksyon sa kagamhanan sa dakbayan, apan mibalik ra usab ang tubig tungod sa way hunong nga pag-uwan sa nangaging mga adlaw.

Gikataho nga nangreklamo na usab ang mga mulopyo tungod sa napundong tubig nga posibleng maghatag kanila og sakit ilabi na sa kabataan.

Apan nasayran ni Mayor Tomas Osmeña nga mga squatters diay ang nahisgutang mga mulopyo ug giingong gusto na sa tag-iya niini nga papahawaon.

Tungod niini nag-duha -duha na ang mayor pagtabang sa apektadong mga pamilya tungod kay kini giingong dili angayang mopuyo sa maong dapit.

“I don’t think it’s fair for me to make him spend to maintain this area for the benefit of illegal settlers in his property,”sumala ni Osmeña.

Gibana-bana nga dunay dul-an sa usa ka gatos ka mga pamilya nga nag-ukopar sa luna ni Go diha sa nahisgutang duha ka sitio.

Dili lang unya ang posibleng sakit nga motakboy maoy mamahimo nilang problema, apan lakip na ang kabalhinan kung sila papahawaon sa tag-iya sa luna nga ilang giukopahan.