Liog sa mag-uuma giabis og sanggot

Giabis og sanggot ang liog sa usa ka lalaki sa kaugalingon niining manghod human sa ilang init nga panaglalis didto sa barangay Lamacan, lungsod sa Sibonga, Cebu niadtong Martes sa alas 2:45 sa hapon atol sa kapistahan ni San Juan.

Ang biktima giila nga si Renato Redoblado, 34, minyo ug usa ka mag-uuma nga nagpuyo sa nahisgutang lugar.

Samtang ang gitumbok nga suspek mao ra usab ang kaugalingon niining manghod nga dugay na niyang gikaaway nga giila nga si Raul Redoblado, 33,  manghud sa biktima ug nagpuyo sa Lower Magcagong, sakop sa maong lungsod.

Gibutyag ni PO2 Ederlino Bacusmo sa Sibonga Police Station sa  dihang nahinabi sa Banat News subay sa inisyal nga imbestigasyon niini nga dugay nang nagkaaway ang biktima  ug ang manghod niining suspek ug sa wala pa ang hitabo nagkalalis kini.

Pagkahuman sa ilang lalis nanglaba ang biktima sa gawas nga bahin sa pinuy-anan niini sa dihang kalit lang miabot ang suspek nga nagdala og sanggot ug sa walay daghang pangutana giabis niini ang liog sa biktima.

Maayo na lang gani kay nakabantay ang biktima ug abtik kining nakasibat apan nakaangkon gyud kini og samad tinigbasan agi sa sanggot sa liog. Luwas na hinuon kini sa peligro human magpatambal sa Carcar District Hospital.