Nasunog ang usa ka 2 storey building nga nahimutang sa N. Bacaltos st., sa barangay Poblacion lungsod sa Sibonga, Cebu niadtong Domingo sa alas 10:30 sa gabii bisan pa sa nasinati nga pag-uwan, uwan niadtong higayona tungod sa bagyong Frank.
Gibutyag ni SFO2 Roman Cerenio, fire marshal sa Sibonga, sa dihang nahinabi sa Banat News nadawat nila ang alarma sa sunog sa maong commercial building nga gipanag-iya sa magpapatigayon nga si Joel Cabardo alas 10 pasado sa gabii.
Apan matud niya nga sulod lang sa pipila ka minutos ila dayon nga nasumpo ang pagkatap sa kalayo nga nagsugod sa stockroom sa maong tindahan sa ikaduhang andana.
Matud ni SFO2 Cerenio nga wala makakatap ang kalayo ug ang mga tinda lang ang nadaot ug ang stockroom tungod kay naapas dayon nila kini ug miabag usab ang mga kabomberohan gikan sa siyudad sa Carcar, Argao ug Boljoon.
Gawas niini, 200 metros lang ang gilay-on sa maong establisamento gikan sa fire station nga nabantayan usab dayon sa mga estambay sa lugar ug mao kini daling nagpahibalo kanila.
Subay sa inisyal nga imbistigasyon sa kabomberohan, electrical wiring, sa ikaduhang andana sa maong edipisyo ang hinungdan sa maong sunog nga gibanabanang nakatala lang og danyos sa mga sari sari nga baligya niini nga sobra sa P6 mil.