Amerikano nanagit gisikop

Usa ka Amerikano nagtingkagol sa Parian Police Station human  managit sa usa ka babaye, nanion ug nagpabuto sa iyang armas kagahapon sa alas 3:40 sa kadlawon diha barangay Kamagayan.

Ang suspetsado giila sa kapolisan nga si Luisito Filamor, 33, American National, nga natawo sa San Francisco California, USA ,apan Filipino ang mga ginikanan, ug nagpuyo sa Avila Compound sa Juana Osmeña Extension sa  barangay Capitol Site ning dakbayan.

Si Filamor nasikop nila ni Police Inspector George Ylanan hepe sa Criminal Investigation and Intelligence Bureau (CIIB) ug mga kaubanan mga alas 6:11 sa buntag kagahapon diha sa Avila Compound human sa ginukdanay.

Sa spot report sa Parian Police Station ang akusado gialarma human dagita ang usa ka Lilet Basalo, 18, taga Dumlog, Talisay City diha sa barangay Kamagayan.

Matud pa sa kapolisan nga gipugos sa suspetsado si Basalo sa pagpasakay sa iyang sakyanan nga  Nissan Sentra nga may plate no.WEZ-937,  kolor nga green.

Ang mga saksi miingon nga ang suspetsado nagpabuto usab sa iyang armas nga wala hisayri ang kalibre, unya  nanion usab ngadto sa  ginganlan og Relagine Sungahid ug Joseph Flores sa maong lugar.

Hinuon naluwas si Basalo human gukora sa kapolisan ang sakyanan sa langyaw  ug gipusil ang  walang ligid sa atubangan hinunghdan  nga mihiyos kini.

Apan bisan og hiyos na ang ligid gipadagan lang gihapon kini sa  Amirekano kay buot mo-eskapo apan gisundan sa kapolisan hangtod didto sa balay niini diin didto kini hidakpi.

Ang akusado gipaubos sa paraffin test sa PNP Crime laboratory kagahapon sa buntag samtang gihikay pa sa kapolisan ang kasong abduction, indiscriminate firing ug grave threats.

Ang Banat News misuway unta sa pagkuha sa habig sa akusado apan nagdumili kini sa pagluwat og pamahayag  ug miingon nga magpaabot lang siya sa iyang uyoan nga magdala og abogado.