Namisita gipusil

Nakalingkawas sa tinong kamatayon ang usa ka cell phone technician human pusila makadaghang higayon sa tulo ka wala mailhing lalaki kagahapon sa alas 4:00 sa kaadlawon diha sa Englis V. Rama barangay Guadalupe.

Ang naluwas giila sa kapulisan nga si Solomon Castro Jr., 25, taga Katipunan Salvador barangay Labangon ning dakbayan dihang gipusil sa nagkadaiyang parte sa iyang lawas.

Si Castro  mitug-an sa mga imbestigador sa Homicide Section nga siya gikan pa sa iyang uyab ug nagpaabot og masakyan niadtong higayuna dihang giduol sa tulo dayon walay daghang estorya kalit nga mipusil kaniya.

Si Castro naigo diha sa tuong bahin sa nawong, tuong siko, tuong bukton ug pulso ingon man sa tuong bahin sa lawas.

Hinuon ang biktima bisan kun samaran nakahimo pa kini sa pagdagan ug nisakay og taxi nga nagpahatod sa barangay Duljo-Fatima aron sa pagpangayog panabang sa iyang inahan kinsa mao nay mihatod niini sa pribadong tambalanan.