1 mil pamilya gibanlas sa dagat

Dul-an sa 1,000 ka pamilya nga nagpuyo sa daplin sa kabaybayonan sa dakbayan sa Talisay ang nangabanlas sa bawod human ang ilang mga balay gikuso-kuso sa dagkong bawod dinala sa bagyong Frank kagahapon sa buntag.

Ang grabeng naapektahan mao ang mga residente sa sitio Litmon, barangay Poblacion human mangaguba ang ilang mga balay paghapak sa bawod.

Ang maong mga residente ang misungasong sa dagat aron lang masalbar ug gitagsa-tagsa og pamunit ang nahabiling mga materyales sa mga balay nilang nangabungkag.

Si Felipa Solana ang hepe sa Talisay City Social Welfare mibutyag kagahapon sa Banat News nga sobra sa 800 ka pamilya ang naapektohan sa barangay Tanke, 112 sa Dumlog diin naglangkob kini sa mga pamilyang nawagtangan og mga balay, partially damage ug nalunopan sa tubig.

Apan wala pa nila matala kung pilay naapektahan sa barangay Poblacion.

Si Solana nagkanayon nga niadtong Biyernes pa sila nipahibalo sa mga kapitan sa barangay aron pabalhinon ang mga residente sa evacuation center paglikay sa disgrasya apan matud niini nga ang mga nahisgutang residente ang wala mopatuo.

Wala hinuoy nasamdan ug nakalas sa maong insidente.

Si Christine Lazaga, 38-anyos, kinsa dunay upat ka anak nga taga sitio Litmon nawad-an na og kapuy-an human kini mabungkag paghapak sa dagkong bawod.

Matud pa niya nagdumili sila og biya sa ilang lugar tungod kay wala sila’y kabalhinan.

Matud niini nga kompleto na sila sa mga rekisitos sa urban poor apan dili sila makaabot sa binuwan nga datahan nga sobra sa P500 sa San Pio Village diin unta sila ibalhin.

Ang dakbayan migahin og 30 ka sakong bugas alang sa mga apektado ug 30 usab ka sakong bugas ang gihatag sa kagamhanan sa probinsiya.

Sa laing bahin, si Solana ang mibutyag usab nga tulo ka balay sa barangay Lawaan III ang natumbahan og kahoy lakip sa nadanyos sa hitabo ang barangay hall kagahapon sa buntag apan walay gikatahong naangol sa maong hitabo.

Ang kabomberohan usab sa dakbayan ang miresponde sa alarmang may mga poste nga nagsiga.

Si SFO2 Marcial Vilvestre sa pakighinabi niini sa Banat News kagahapon nagkanayon nga ang poste diha sa sitio Miramar, barangay Poblacion, sitio Kilawan, barangay Tanke midilaab human mangaluag ang ilang mga kable tungod sa pagsige og hapak sa kusog nga hangin.

Samtang ang poste sa sitio Uldog, Poblacion ang miharag tungod usab sa kusog nga hangin.