Health workers nabalakang ‘hugnoan

Mga health worker sa Rural Health Unit (RHU)-3 sa barangay Lawaan III, dakbayan sa Talisay nabalaka nga mahugmakan sa ilang health center tungod sa kagabok na niini.

Si Cora Babanto, midwife-3 nga nadestino diha sa nahisgutang RHU sa pakighinabi niini sa Banat News nagkanayon ang nahisgutang duha ka andanang health center nga ang katunga ginama sa kahoy natukod niadto pang 1970’s.

Ang bintanang kahoy ang naghinay-hinay na og katagak tungod sa anay ug gitabil-tabilan na lang.

Tungod usab kay di na lig-on ug daghan nang buslot ang maong klinika wala kini palabya sa mga kawatan pipila na ka mga semana ang nakalabay ug gikawat ang ilang microscope.

Ang mga health workers anha nalang karon magpundo sa silong gumikan  kay gikatahong mouyog na ang ibabaw’ng bahin sa maong health center.

Matud ni Babanto nga gipahibawo na nila kini ngadto sa kagamhanan sa dakbayan ug gisusi na kini sa city engineering apan hangtod karon wala pa gyud ma-renovate ang nahisgutang health center.

Sa laing bahin, si Talisay City administrator Richel Bacaltos sa pakighinabi niini sa Banat News kagahapon  nagkanayon nga mao pay iyang pagkahibawo sa maong sitwasyon sa nahisgutang health center ug misaad nga iyaha dayon kining ipasusi.

Wala hinuon maghisgut ang opisyal kung duna bay giandam nga pundo alang niini.

Sukad sa pag-retiro sa milabay’ng tuig nila ni Doktor Virgilio Tangarorang ug Milagros Carloto sa RHU sa Talisay wala pa gihapoy nadawat nga mopuli sa ilang mga posisyon.

Gihulagway nga nakaapektar kini og dako karon sa mga kabus nga Talisaynon nga dili maka-afford og bayad og pribadong mga doktor.

Si Bacaltos mitataw nga ang Personal Selection Board hangtod karon padayon pa sa ilang pag- interview sa mga aplikante nga maoy mopuli sa pwesto sa duha.