Curfew ipatuman sa Pasil

Did-an na unya ang mga minor de edad diha sa barangay Pasil ning siyudad sa Sugbu nga makasuroy panahon sa kagabhion gikan sa alas 10:00 sa gabii hangtud sa alas 4:00 sa kaadlawon.
Matud ni kapitan Romeo Ocarol nga gisugdan na nila pagpahibawo ang mga mulopyo sa bag-o lang napanday nga Curfew Ordinance sa barangay pinaagi sa gihimo nilang recoreda.
Kini samtang gitun-an pa usab sa konseho sa dakbayan ang nahisgutang ordinansa kung wala bay babag sa pagpatuman niini.
Gitataw ni Ocarol nga ang ilang gipanday nga balaud gipahaom usab sa Akta Republika 9344 kon ang Juvenile Justice and Welfare Act.

Kini nagpasabot nga dili nila sikupon ang mga minor de edad, kun dili ang mga ginikanan maoy ilang papanubagon sa magsuroy-suroy nilang mga anak.
Ubos sa ordinansa, ipatawag sa barangay ang mga ginikanan sa una ug ikaduhang kalapasan sa bata, ug kini mag-atubang na unya og kaso kung dili makabadlong sa anak sa ikatulong higayon.
Nagkanayon si Ocarol nga ang tumong sa ilang ordinansa mao ang pag-rescue sa mga bata nga giingong maglaroy-laroy sa ilang barangay bisan sa lawom na nga kagabhion.

Nasayran nga ang dakbayan duna nay Curfew Ordinance nga napanday niadtong 1999 pinaagi sa pagpangamahan ni kanhi konsehal Manuel Legaspi.

Ubos sa maong ordinansa i-turnover sa ginikanan ang bata nga masikop sa una ug ikaduhang kalapasan niini, apan kini papanumpaon nga dili na muusab gawas nga ipaubos sa counselling.
Sa ikatulong higayon nga masikop ang bata, uban sa ginikanan niini sila paserbisyuhon na sa komunidad sulod sa pito ka adlaw.
Kung masikop pa ang bata nga nakalapas sa ordinansa sa ika-upat ka higayon, ang ginikanan pasakaan na og tukmang kaso ngadto sa hukmanan.