Spider cab gisupak

Ang mga dalan sa dakbayan sa Mandaue nga daghan na ang nga mga de pasaheroan nga nagdagan   dili na angayan pa nga padaganan og laing matang sa pasaheroan nga sama sa gitinguhang Spider cab.

Si Peter Pabillo, liaison officer sa  Nagkahiusang Drayber sa Sugbo (NADSU) nga nahinabi sa Banat News  mipadayag  nga dili lang mahimong kompetensiya sa mga pasaheroan nga sakyanan sa dakbayan sa Mandaue nga  gitinguhang mopadagan og 30 ka Spider cab kun dili makadugang kini sa suliran sa trapiko.

Gitataw ni Pabillo nga daan na nga nahimong suliran ang panaghuot sa mga sakyanan sa kadalanan sa dakbayan ug ang pagdugang og laing matang sa mga pasaheroan nga sama sa Spider cab  makapasamot kini sa maong suliran.

Si Pabillo miingon nga ang pag-abli ug pagpalapad sa mga dalan sa dakbayan sa Mandaue mao unta ang tinguhaon sa mga opisyal ug dili ang pagplano og dugang pa nga mga sakyanan.

“Kun dunay angayan nga padaganan  og Spider cab o bag-ong pasaheroan nga sakyanan kadto untang mga dapit nga  nihit pa kaayo ang mga sakyanan ug dili sa dakbayan sa Mandaue,” ni Pabillo pa sa iyang pamahayag.

Hinuon si Land Transportation Franchising Regulatory Board (LTFRB) 7 Director Romulo Bernardes dihang nahinabi sa Banat News miingon nga ang ilang buhatan dili na moluwat og bag-ong prangkisa sa mga dapit nga daghan na ang pasaheroan nga sakyanan nga  nagdagan.

Giklaro niya nga mohatag lamang og bng-ong prangkisa ang ilang buhatan sa mga dapit nga ilang masuta nga wala pay nagdagan o nihit o walay mga sakyanan nga de pasaheroan.