Mga tinun-an sa Elem. midaghan

Misaka karon ang gidaghanon sa mga tinun-an sa elementarya sa publikong mga tunghaan dinhi sa dakbayan sa Sugbu.
Kini maoy gipahibalo ni Cebu City Schools Division Superintendent  Lorna Rances sa dihang nahinabi sa Banat News.
Hinuon miingon si Rances nga gamay lang ang pagsaka sa gidaghanon sa mga tinun-an sa elementarya itandi sa gidaghanon sa miaging tuig.

Sa nakalabay nga tuig-tingtungha dunay kinatibuk-ang 93, 670 ka mga tinun-an sa elementarya ang dakbayan, apan kini niabot na karon sa 95, 285 ka mga tinun-an.
Duna hinuoy pagkunhod karon ang mga tinun-an sa mga public high school itandi sa gidaghanon sa mga tinun-an sa miaging tuig.
Matud ni Rances nga sa miaging tuig tingtungha, ang siyudad dunay 44, 866 ka mga tinun-an sa high school, apan sa kasamtangang tuig-tingtungha mikabat na lang og 44, 529 ang populasyon.
Wala mohatag og klarong hinungdan ang City Schools Division Superintendent niini apan giingong dunay posibilidad nga kini nagagumikan sa kalisud sa panahon.

“Dili man gyud na malimod nga dunay mga ginikanan nga maglisod o dili maka-afford pagpalit sa gikinahanglan sa mga tinun-an,” sumala ni Rances.
Nagtuo hinuon si Rances nga madugangan pa ang gidaghanon sa mga tinun-an sa publikong mga tunghaan sa dakbayan.
Kini tungod kay giingong nagpadayon pa ang enrollment ug padayong manawat ang mga publikong mga tunghaan sa mga late enrollees hangtod sa katapusan niining buwana.

Sa makausa pa nanawagan si Rances sa mga ginikanan nga i-enroll na ang mga anak niini nga gustong moeskwela tungod kay nagsugod na ang klase.
Miingon si Rances nga dili angayang palabian og kadugay ang pagpa-enroll sa mga bata aron dili usab kini maglisod paggukod sa ilang leksyon.