Pamilya nag-unay og tinigbasay

Duha ang samaron ug pulos nalandig sa tambalanan human  usa ka pamilyahan   nag-unay og dinunggabay ug tinigbasay human nagka-deperensiya sa ilang gamay’ng negosyo ug panginabuhi-an didto sa Barangay Bas Daku, lungsod sa Moalboal, Cebu niadtong Lunes sa alas 9:40 sa gabii.

Ang mga samaran nga pulos gidala sa managlahing tambalanan  giila nga si Ambrocio Sadagnot,  usa ka panday  ug molupyo sa nahisgutang lugar,  Macario Sadagnot, magulang  ni Ambrocio, minyo ug nagpuyo gihapon sa maong lugar.

Samtang ang gitumbok nga suspek mao ang usa ka James Sadagnot, pag-umangkon  ni Ambrocio ug anak ni Macario.

Matud ni SPO1 Ruben Lahiluden sa Moalboal Police Station sa  dihang nahinabi sa Banat News subay sa blotter nga gibasehan niini ang unang pagpanunggab nahitabo samtang ang biktima naglingkod  kauban sa iyang inahan ug manghod nga si Lorna ug ang bana niini nga si Andrew Jimenez.

Samtang naglingkod- lingkod sila ug nagpaabot nga dukaon kalit lang miabot  si James kauban sa iyang amahan nga si Macario.

Matud pa kalit lang gikasab-an  ni Macario ang magtiayon nga sila si Lorna ug Andrew nga manghod  ni James ug   nagkanayun.” Kamong magtiayona mo naglagot ko ninyo naay ka lami gyud ninyo sumbagon uy.”

Ang maong pamahayag gisegundahan pa kini og litok  ni Macario hinungdan nga napungot  si James ug miibot kini sa iyang giluklok nga kutsilyo ug deretso og dunggab ni Ambrocio.

Si Ambrocio nga nakaangkon og samad sa wala nga abaga daling gidala sa Badian District Hospital samtang daling misibat ang  mga suspek.

Apan wala magdugay  si Ambrocio mibawos ug mikuha kini og sundang ug gitigbas  si Macario nga iyaha  ra usab nga magulang ug naigo kini sa walang bahin sa iyang mata.

Apan abtik nga nakakuha usab og kutsilyo  si Macario ug misukol unta kini apan gitabangan dayon og ulang sa ilang mga kauban sa pamilya.

Ang biktima nga si Macario gidala sa Barili District Hospital pagkahuman sa hitabo aron patambalan.