Nangatang ug nanunggab wala pa ilhi

Nagpadayon ang pakisusi sa kapolisan aron mailhan ang  usa ka lalaki sa sitio Sto. Niño, barangay Casili, lungsod sa Consolacion kinsa giingong nangatang sa miaging gabii ug nanunggab sa biktima nga nagsakay og motorsiklo.

Si PO1 Winston Magdadaro nga nahinabi sa Banat News miila sa biktima nga si Jimmy Illustrisimo Saavedra, 36-anyos, minyo, kinsa nagpuyo sa maong dapit.

Matud pa ni PO1 Magdadaro nga gisugo si Saavedra sa iyang agalon nga si Georamy Lopez sa paghatod sa iyang bisita sa eskina sa barangay Canduman, dakbayan sa Mandaue.

Sa pagbalik sa biktima gikan nga naghatod sa bisita ang suspetsado nga nailhan lang sa angga nga “Junior” kinsa giingong suko kaayo ang nag-atang na sa gi-agi-an ni Saavedra.

Nakapabulhot sa pagpadagan pauli sa panimalay sa iyang agalon ang biktima ug gisugilon sa  iyang agalon ang nahitabong pag-atang kaniya.

Ang agalon nga nasayod sa maong hitabo ang nagdaling nagpauban sa biktima pagbalik sa maong dapit.

Matud ni PO1 Magdadaro nga natingala na lang ang agalon ni Saavedra sa ilang paghidangat sa maong dapit sanglit kalit man kining mipabulhot sa  iyang motorsiklo ug pag-abot sa unahan kalit kining natumba uban sa motorsiklo niini ug nakuyapan.

Ang agalon ni Saavedra kinsa nagdali og pakisusi ang nakamatikod nga daw nawad-an ang biktima sa hangin hangtod nga nakuyapan.

Si Saavedra ang daling gidala sa iyang agalon sa Vicente Sotto Memorial Medical Center sa dakbayan sa Sugbo.