Nakaikyas sa pagsikop sa mga polis ang usa ka giingong drug pusher human nga ang mga paryente niini ang mibabag niadtong Martes sa gabii sa sitio Tunga, barangay Tanke, dakbayan sa Talisay.
Ang suspetsado mao si Ricky Gasalatan, hingkod ang panuigon, ulitawo residente sa nahisgutang lugar.
Sila si PO2 Roy Lofranco, PO2 Roy Sarsaba ug PO1 Alan Villazurda ang mipahigayon og buy-bust operation ubos sa koordinasyon sa Philippine Drugs Enforcement Agency (PDEA)-7 batok kang Gasalatan.
Si Lofranco maoy gihimong poseur buyer sa grupo diin gamit niya ang P100 bill nga maoy iyang gibayad sa iyaha kunohay’ng pagpalit og shabu ngadto kang Gasalatan.
Si Gasalatan ang mitunol ngadto kang Lofranco og usa ka gamay’ng pakete nga giingong dunay sulod nga shabu.
Ug human og tunol sa suspetsado dali kining gisignit ni Lofranco ug nagpaila siyang usa ka polis.
Sila si Sarsaba ug Villazurda ang daling miduol aron motabang kang Lofranco sa pagsikop kang Gasalatan ug nasakmit sa maong mga polis gikan sa suspetsado ang marked money.
Ang suspetsado ang giingong nagdumili sa pagpasikop sa mga polis hinungdan nga dunay nahitabong tensiyon ug ang mga paryente ni Gasalatan ang nanuol ug giingong mibabag usab aron dili maaresto ang suspetsado
Si Gasalatan nakaikyas gyud tungod sa maong hitabo.