Sakop sa CITOM dili mokiha

Sakop sa City Traffic Operation Management (CITOM) kinsa nabiktima sa pagpamusil ang dili mopasaka og kaso sa iyang silingan kinsa maoy gidudahan nga mipusil kaniya matud sa polis sa dakbayan sa Talisay tungod kay ang biktima dili makatumbok nga ang nasikop maoy nagpusil kaniya tungod kay nagtalikod siya atol sa insidente.

Si PO2 Harrison Quiñanola sa homicide section sa kapolisan sa dakbayan sa Talisay nagkanayon nga ang biktimang si Rosie Caburnay alyas “Ging-Ging” mitataw ngadto kanila nga dili siya mopasaka og kaso batok kang Jessie Villaceran tungod kay dili siya makatumbok kung mao ba gyud kini ang nagpusil kaniya tungod kay nagtalikod man siya.

Apan kung ang tulo ka saksi sa maong insidente motumbok nga si Villaceran maoy mipusil kang Caburnay ang biktima mopasaka dayon og kaso batok sa suspetsado.

Kahinumduman nga si Caburnay ang gipusil niadtong Lunes sa gabii diha sa ngit-ngit nga bahin duol na sa ilang balay samtang ang biktima naglakaw kini paingon nang mopauli gikan sa iyang duty.

Si Villaceran ang gisikop sa grupo sa Special Weapon and Tactics (SWAT) sa dakbayan sa Sugbo nga nag-roving diha sa South Reclamation Project ug ang homicide section sa Cebu City Police Office maoy mitugyan kang Villaceran ngadto sa kapolisan sa Talisay.

Base sa follow-up nga imbestigasyon sa mga sakop sa homicide section sa kapolisan sa Talisay nga may kalambigitan sa bangi sa yuta ang usa sa ilang nakitang motibo sa maong hitabo.

Si Quiñanola midungag nga gipaubos nila sa paraffin test si Villaceran apan wala pa nila makuha ang resulta niini ug ang suspetsado ilaha dayong gibuhian kagahapon sa hapon sanglit wala may kaso nga gipasaka ang biktima.