Namapatud-an nga nakapabuto og armas ang hepe sa mga tanod sa barangay Ermita human positibo sa gun-powder nitrate ang duha ka mga kamot niini human sa paraffin test nga gipahigayon sa PNP Crime Laboratory niadtong miaging adlaw.
Si Vicente Beltran Bosque nga maoy gitudlo sa amahan sa 14-anyos nga maoy namusil, nasuta nga positibo sa pulbora.
Ang hepe sa Homicide Section nga si Sr. Insp. Mario Monilar nagkanayon nga positibo sa gun-powder nitrate ang duha ka kamot ni Bosque base sa gipagawas nga resulta gikan sa PNP Crime Laboratory.
Ang resulta sa paraffin test giduso ni Monilar ngadto sa Cebu City Prosecutor’s Office aron isuporta sa kasong gipasaka batok ni Bosque.
Sumala pa ni Monilar nga makatabang ang resulta sa paraffin test sa pagpakusog sa kasong homicide nga giatubang karon ni Bosque tungod sa kamatayon ni Junard Anter.
Subay niini, ang amahan ni Junard nga si Ananias miangkon nga nakabungat gyud siya og P30 mil ngadto kang Kapitan Felicisimo Rupinta human usab kini makig-settle niadtong Martes sa kantidad lamang nga P15 mil.
Apan matud ni Ananias nga nabantayan niyang gituyoktuyok lamang siya sa saad nga hinabang gikan kang Rupinta hinungdan nga gihugtan niya iyang desisyon pagpasaka og kaso ni Bosque.