Rupinta gidapigan

Gidepensahan ni Mayor Tomas Osmeña si Ermita barangay captain Felicisimo “Emok” Rupinta sa kalangay pagpasurender niini sa hepe sa iyang mga tanod.

Sa samang higayon, gidapigan usab sa mayor ang suspek nga si Vicente Beltran Bosque, human motahan sa iyang kaugalingon ngadto sa kapulisan.

Si Bosque positibong giila ni Ananias Anter ang amahan sa 14 anyos nga si Junard nga maoy nakaigo sa batan-on niadtong miaging Domingo sa kaadlawon.

Naigo sa saag nga bala ang bata sa walang bahin sa iyang dughan ug wala na matabang sa mga mananambal hinungdan nga kini namatay pipila ka oras human sa insidente.

Gikataho nga si Bosque uban sa iyang duha ka sakop mitubag ug alarma labot sa usa ka fruit vendor, nga nimugna og kasamok diha sa Carbon area samtang nagdala og sundang ug duna pay report  nga kini nanulis.

Kini giingong gipusil sa nirespondeng tanod ug naigo sa paa, apan napagan usab ang batan-on nga maoy nakaingon sa hinanaling kamatayon niini.

Apan alang sa mayor dili intensyon sa tanod ang pagpatay sa minor de edad kun dili ang pagpatunhay sa kahusay ug kalinaw sa barangay.

“The tanod was not well-trained, but it was not the intention of the tanod to kill a boy, his job is to provide protection to the barangay,” sumala sa mayor.

Samtang gipadayag usab ni Osmeña nga siya nakasabot sa sitwasyon ni Rupinta sa kalangay niini pagdesisyon sa angayang buhaton ngadto sa iyang tanod.

“If I were the barangay captain I’ll have some reluctance also, I’ll see to it what I can do to protect my tanod although for being stupid,” dugang pamahayag ni Osmeña.

Giangkon hinoon sa mayor nga dunay panginahanglan nga ipaubos sa training ang mga barangay tanod, apan kini iya nang gitugyan sa mga barangay nga hingtungdan.

Sa pikas bahin gipasalig ni Osmeña nga hatagan sa siyudad og hinabang pinansyal ang hingtungdang pamilya alang sa pagpalubong sa batan-ong biktima.