Gipusil, gitigbas ang misulong

Gipusil na, gitigbas pa hangtud namatay. Kini maoy gidangatan sa usa ka mag-uuma nga misulong og away sa iyang silingan niadtong Lunes sa hapon diha sa bukirang bahin sa barangay Matun-og lungsod sa Balamban.

Nakaangkon og daghang samad pinusilan ug tinigbasan sa nagkadaiyang bahin sa kalawasan si David Sadura, nga nakaingon sa iyang hinanali nga kamatayon.

Samtang ang misurender kagahapon sa buntag sa kapolisan ang suspek nga si  Jennifer Alas Doce 26.

Matud ni PO3 Eugene Macapas sa Balamban Police station nga nahinabi sa Banat News mitug-an   si Alas Doce kanila nga sa wala pa ang insidente nakadungog siya nga may komosyon sa ilang balay.

Dihang iyang gisusi naabtan niini si Sadura nga nagdala og armas ug sundang, gikatahong pagkakita kaniya ni Sadura kalit siyang gipusil niini apan wala makaigo hinungdan iya kining gilayog ug nailog ang armas lakip na usab ang sundang ug gigamit kini niya pagpusil ug pagtigbas kang Sadura.

Ang maong hitabo wala ma-report sa kapolisan hangtud nga kagahapon sa buntag boluntaryong mitahan sa kaugalingon si Alas Doce sa buhatan sa kapolisan.

Matud ni PO3 Macapas ilang paabuton ang mga nakasaksi sa hitabo aron masayran usab nila kung tinuod ba ang alegasyon ni Alas Doce nga gisulong ang iyang kapuyo sa biktima niadtong higayona.

Wala usab matino sa kapolisan kung unsay armas ug klase sa sundang ang gigamit pagpatay sanglit walay gi-turn over si Alas Doce kanila.

Sa pagka karon padayon pa ang gihimong imbestigasyon sa kapolisan aron usab mahibaw-an ang motibo sa kremin. Kagahapon sa buntag gikatakdang ipailawom sa awtopsiya ang patay'ng lawas sa biktima.