Chief tanod gikiha’g homicide

Pormal nang gipasakaan og kasong homicide ang hepe sa mga tanod sa Ermita may labot sa kamatayon sa usa ka 14-anyos nga bata diha sa Carbon Market niadtong milabay’ng Domingo sa kaadlawon.

Si Vicente Beltran Bosque, 48, gidala kagahapon sa mga sakop sa Homicide Section sa piskalya alang sa pagsang-at sa kaso kini bisan paman sa report nga misuway og areglo ang kapitan sa barangay Ermita nga si Felicisimo Rupinta.

Si Bosque positibong giila sa amahan ni Junard Anter nga si Ananias nga maoy nipusil sa iyang anak niadtong tungura atol nga dunay gigukod ang mga tanod nga tawong gikatahong nanghasi apan sa ulahing report nanulis og vendor diha sa Carbon, giila ang maong tawo nga si Wilson Bagol,27, si Bagol napusilan usab diha sa walang dapi-dapi.

Ang amahan sa bata nagkanayon nga dili siya modawat nga areglohon ra ang kinabuhi sa iyang anak. Sumala pa niini nga bugtong gusto niyang makab-ot mao nga kini mapalubong ug ingon man mataral sa hukmanan ang responsable.

Si Sr. Insp. Mario Monilar, hepe sa Homicide Section nagkanayon nga bisan walay murder weapon nga narekober o gi-surrender mapasakaan gihapon nila og kaso si Bosque subay sa testimonya, resulta sa paraffin test ug sa death certificate sa bata.

Dili hinuon nila mapasakaan og murder nga kaso si Bosque gumikan kay base sa sirkumstansya sa hitabo wala tuyoa ang pagkaigo sa bata sanglit saag nga bala ang nakaigo kaniya.

Samtang kabahin sa armas nga gigamit, nagkanayon si Monilar nga dili nila mapugos si Bosque sa pagtahan niini. Dunay mga pagdudang ang armas nga gigamit sa mga tanod walay mga lisensya niadtong tungora.

Hinuon si Bosque kusganon nga mihimakak nga duna siya’y armas nga gidala niadtong pagresponde nila sa alarma sanglit radyo ra ang iyang gidala ug mao usab ang nangita og masakyan sa bata aron kini madala sa tambalanan.

Sa laing bahin, si Luvy,32, inahan sa bata naghilak nga nisaysay unsa kaanugon sa kinabuhi sa iyang anak. Matud pa niini nga sa tanan niyang mga anak mao kini ang dako og pangandoy alang sa iyang mga manghod.

Si Junard gikatahong nitapos ra og elementarya ug gumikan sa kalisod nidesider kining di na mopadayon og eskwela ug mitabang sa pagpangarga sa iyang amahan diha sa Carbon.

Matud pang Luvy si Junard usab maoy mangunay og linya sa NFA Rice aron makapalit og baratong bugas ug usahay maninguha kini og pangarga og daghan aron mahatag sa inahan aron madungagan ang mapalit nilang bugas.

Samtang si Rupinta nagkanayon nga 23 ka tuig na isip tanod si Bosque ug karon pa kini mahitabong gireklamo, katulo na usab kini napiling Most Outstanding Barangay Tanod of the year atol sa iyang pagkakapitan.

Si Bosque gikatahong nakadawat na og mga pasidungog sa Cebu Chamber of Commerce, Lion’s Club tungod sa maayong panerbisyo niini isip tanod sa barangay.