Babayeng enforcer gipusil

Nalandig sa tambalanan ang usa ka babaye nga sakop sa City Traffic Operation Management (CITOM) human kini giingong gipusil sa ilang silingan niadtong Lunes sa gabii sa sitio San Rafael, barangay Tanke dakbayan sa Talisay.

Ang biktima mao si Rosie Caburnay alyas “Gingging” 46-anyos, biyuda kinsa nakaangkon og mga samad pinusilan sa tuong bahin sa lawas ug ang bala milahos  sa  tuong bahin sa tangkugo ug ang bala milahos sa ubos nga bahin sa iyang lawas ang daling gidala sa usa sa mga tambalanan sa dakbayan sa Sugbu.

Ang suspetsado mao si Jessie Villaceran, 46, kinsa nagtingkagol karon sa Talisay detention cell human masikop sa gipahigayong hot pursuit operation sa kapolisan sa Talisay ug grupo sa Special Weapon and Tactics (SWAT) sa Sugbo.

Base sa imbestigasyon sa homicide section sa kapolisan sa Talisay nga si Caburnay  gikan sa dakbayan sa Sugbu ug naglakaw kini paingon na diha sa ilang balay ug gisundan sa suspetsado ug pagduol sa biktima diha sa ilang balay gipusil dayon kini sa suspetsado.

Ang grupo sa SWAT kinsa nag-roving diha sa South Reclamation Project   unang miresponde sa maong hitabo.

Si Caburnay  nanawag og panabang sa dihang naigo na kini sa mga bala ug ang iyang anak nga si Rosie Vic ug laing duha ka kuyog niini ang daling miduol ngadto sa biktima apan gipamusil usab sila sa suspetsado apan swerte kay wala sila mangaigo sa maong pagpamusil.