Amang gi-gang rape

Upat ka mga lalaki ang gitudlo sa usa ka 16-anyos nga amang nga maoy ni-gang rape kaniya diha sa sitio Kamanggahan barangay Labangon niadtong milabay'ng Domingo.

Duha niini managsuon nga menor-de edad ug ang laing duha nagpangidaron og 18 ug 27 anyos kansang mga pangalan gipugngan samtang wala pay kasong napasaka.

Ang amang pinaagi sa pagmustra ug senyas sa mga kamot mipasangil nga ang pag-gang rape kaniya nahitabo niadtong alas 2 sa kaadlawon sa adlaw'ng Domingo diin siya gikatahong gipugngan sa upat ug gipuli-pulihan og lugos.

Wala hinuon maklaro kung gihulgang patyon ang biktima gawas lang sa pagsenyas nga gipugngan sa mga suspek ang iyang mga bukton ug tiil samtang ang uban nagsugod og lugos kaniya.

Apan sa pakighinabi sa Banat News sa mga nadetinir nga suspek kusganon nilang gipanghimakak ang alegasyon ug nagkanayon nga tumo-tumo ra ang gihimo sa babaye.

Ang usa sa upat nga nadakpan miangkon nga nakadungog siya og kasikas diha sa kamanggahan apan wala niya kini panumbalinga, apan nakurat nalang siya dihang siya gidakop sa mga tanod.