Power lotto sugdan karon

Sugdan na karong gabii ang unang draw sa Power Lotto nga nagtangag og jackpot prize nga P50 milyones hangtod na sa P500 milyones alang sa palarang mananaug.

Matud pa ni William Medici, ang PCSO Department Manager sa Online-Lottery sa Visayas ug Mindanao nga karong gabii maoy unang bola sa Power Lotto lukop nasud nga maoy bag-ong produkto nga ilang gitanyag ngadto sa katawhang Pilipino nga buot mag-milyonaryo.

Ang pot money sa Power Lotto mokabat sa P50  ang pinakaubos nga pusta diin mopili kini og lima ka numero gikan sa 1 ngadto sa 55 ug laing numero nga pilion gikan sa 1 ngadto sa 10 isip maoy power number sa mopusta aron makadaug sa P50 milyones.

Kung mogawas ang napili nga power number kini maghatag og giya sa pagdaug og P100 kun duha sa imong numero ang mogawas P400 kung duha ka numero plus power number, P4 mil kun tulo plus power number, P50 mil sa upat ka numero plus power number, P50 milyones kung lima ka numero plus power number ang mogawas.

Samtang sa lima ka numero nga mogawas nga walay power number makadaug kini og P700 mil, P8 mil sa upat ka numero nga walay power number, P600 kung tulo ka numero ang mogawas nga walay power number.

Matud pa ni Medici nga 24 porsiyento sa kita sa Power Lotto ang idugang sa P50 milyones nga premyo sa sunod nga draw kun walay makadaug sa matag draw kada Martes sa gabii.