Pag-video sa mag-sex di mahunong: Bullecer

Dako ang pagtuo ni Doctor Rene Josef Bullecer, nasudnong director sa Human Life International (HLI) nga dili molampos ang balaudnon nga gipalabang sa usa ka pro-life lawmaker nga magsilot niadtong mo-video recording sa gitawag nga “private acts”.

Nasayran ni Bullecer nga si Buhay partylist Representative Erwin Tieng maoy nangamahan ning maong balaudnon kansang mga salaud nga gihisgutan mao ang bahin sa sex scandal nga makita sa mga cellphone, pagpakita niini ngadto sa laing tawo ug pagpasa niini ngadto sa uban.

Gihimo ni Tieng ang maong sugyot kay gibati siyag kabalaka ning nagkadaiyang eskandalo bahin sa “sex” sa mga estudyante sa high school ug kolehiyo karon kansang ngalan sa ilang mga eskuylahan naangin pa.

Gikasubo kini sa partylist representative tungod kay giingong kasagarang “sex object” ning maong mga eskandalo pinaagi sa mga pulos mga batan-on nga nakadaot kaayo sa ilang moralidad.

Apan si Bullecer kinsa usa usab ka pro-life crusader, miingon nga lisud nga maaprobahan ang maong sugyot ni Tieng tungod sa iyang pagtuo nga lisud kini wagtangon karong panahona.

Alang kang Bullecer nga hangtod nga may mga tawo pang gusto nga magpakuha og video sa ilang linawas nga pakighilawas, di  mawagtang kining bisyoha.
Hinuon miingon si Bullecer nga mas maayo nalang nga may nasuwat nga balaudnon si Tieng itandi nianang ubang mga kongresista nga wa gyu'y nahimo diha sa kongreso.

Ubos sa maong sugyot ni Tieng,  ang malapason  mahimong mabilanggo og unom ka tuig, ug multa nga P500,000.