Patay ang usa ka cigarette vendor human kini pusila sa head guard sa usa ka mall diha sa dalan Gen. Maxilom Ave. sa barangay Camputhaw sa milabay'ng gabii.
Ang namatay giilang si Jomar Solon, 27, residente sa Ponce Compound sa Opra ning dakbayan tungod sa samad pinusilan diha sa iyang dughan.
Ang suspek nga dali usab nga miikyas giilang si Servellano Nemaria, sakop sa MISDA Security Agency ug maoy head guard sa maong mall ug nagpuyo sa gihapon sa Opra.
Sa imbestigasyon sa Homicide Section gikan sa kapuyo sa biktima nga si Aurora Torado, 32, ang suspek ug si Solon gikatahong naglalis sayo pa nianang gabhiona tungod kay di gusto sa suspek nga patindahan og sigarilyo ug bisan unsa ang maong waiting shed atubangan sa gibantayan niining establisamento.
Apan nianang pagkataod-taod nibalik ang suspek diha agi sa luyo ug dayong atubang kang Solon ug walay daghang pangutana gipusil ang biktima diha sa dughan ug nagdali pag-ikyas.
Naatol usab nga dunay ambulansyang nahiagi nga diha sa dapit mao nay mitabang sa biktima nga madala sa Vicente Sotto Memorial Medical Center apan gideklarar kining dead on arrival.