Food vendors ipa-accredit na

Idili na unya sa mga sidewalk vendors ang pagpaninda og pagkaon duol sa mga tunghaan sa dakbayan sa Sugbu.

Kini maoy gipahibawo ni  Konsehal Gerardo Carillo kun ang mga manindahay dili magpa-accredit sa kagamhanan sa siyudad isip food vendor.

Subay niini, tigumon ni Carillo ugmang adlawa ang tanang mga sidewalk vendor duol sa mga tunghaan aron hatagan og accreditation.

Ang konsehal nga maoy chairman sa Committee on Education sa City Council  miingon nga dili nila tugotang makapaninda ang mga food vendor nga walay health card.

Matud ni Carillo nga kini maoy usa ka paagi sa siyudad nga masigurong luwas ang mga pagkaon nga gipamaligya duol sa mga tunghaan.

Tumong sa konsehal   nga malikayan ang mga panghitabo sama sa food poisoning diin sagad maapektahan ang kabataan o mga tinun-an.

Labing ulahi nga insidente sa food poisoning mao ang nahitabo didto sa Antipolo, Rizal diin ubay-ubay sa mga tinun-an ang nangalanag.

Kini human usab makapalit ug makakaon sa pagkaon nga gibaligya sa ilang mga magtutudlo diha mismo sulod sa ilang tunghaan.

Nagkanayon si Carillo nga ilang seguruhon nga ang gipangbaligya nga mga pangkaon duol sa mga tunghaan sa dakbayan, luwas kan-on sa kabataan.

“Karong Sabado atong tigumon ning mga vendors duol sa mga tunghaan aron atong i-accredit, tagaan nato og mga health card,” sumala sa konsehal.

“Atong siguruhon nga ang ilang gipamaligyang pagkaon safe gyud para sa atong mga bata ug dili makahilo,” dugang pamahayag ni Carillo.

Dili buot ang konsehal nga mabutang sa risgo ang kahimtang sa panglawas sa kabataan samtang kini anaa sa mga tunghaan.