Kapitan restauro di mokanaog

Ang barangay San Isidro dakbayan sa Talisay duna karoy duha ka kapitan human si Maria Adelaida Restauro midumili pagkanaog sa puwesto bisan pa og na-install na sa Department of Interior and Local Government si Marieta Bucao.

Si Restauro ang naproklamar sa Comelec niadtong eleksiyon sa barangay sa milabay’ng tuig apan si Bucao nga miduso og protesta sa pagduda nga dunay sayop sa pag-ihap sa mga balota maoy nitumaw nga maoy nidaog sa recount.

Kagahapon sa alas 10:00 sa buntag gi-serve ni Susan Bono, clerk of court sa Municipal Trial Court in City sa Talisay ang writ of execution alang kang Restauro.

Ang korte mimando usab sa kapolisan nga mohatag og ayuda aron sa pagmentinar sa kahapsay ug kalinaw atol sa paghulip kang Restauro ni Bucao.

Dunay mga polis nga gipakatap karon sa barangay hall sa San Isidro samtang si Supt. Romeo Perigo maoy nihimo’g negosasyon sa kampo ni Restauro nga magmabugnawon lang.

Dihang niabot ang grupo ni Bucao uban ang mga sakop sa DILG ug korte gikatahong sarado ang buhatan sa kapitan ug gikatahong ang kampo ni Restauro nagkanayon nga nawagtang ang yawe sa maong buhatan.

Ang kapolisan napugos og kuha og tawo nga eksperto sa paggama og master key aron lang kini maablihan.

Si Bienvenido Pasilang Local Government Operation Officer sa DILG sa siyudad maoy mi-install kang Bucao sa puwesto.

Matud pang Bucao nga nahibulong siya sa giingong pamahayag sa kampo ni Restauro nga wala sila’y kalibutan sa mga panghitabo.

“Na saddened ko nga nganong blind pa sila, well in fact everybody knows they are given 20 days to secure the TRO (Temporary Restraining Order) and after 20 days mo-execute na ang judge sa judgment sa iyang writ of execution, therefore nakahibawo man sila nga 20 days lapses kagahapon palang (Miyerkules), mao na ni ang right day sa paglingkod na nako,” ni Bucao pa.

Si Restauro sa iyang bahin, nagkanayon nga ang kampo ni Bucao ang nagdali ug wala gani pa makadawat ang iyang abogado sa writ of execution ug mipasangil kini nga ang huwes nga nag-isyu niini nga si Jugde Mario Manayon ang walay hurisdiksiyon sa isyu ug duna na sila’y petisyon sa Comelec en banc.

Gikuwestiyon ni Restauro ang pag-serve sa writ of execution diha sa barangay hall ug gitawag niya kining pugoso kaayo.

Si Restauro nagkanayon nga sa maong hitabo maapektuhan niini ang mga taga San Isidro ug mag-agad lang siya sa iyang abogado sa sunod nga hitabo diin hangtod nga dili moingon ang iyang abogado nga mokanaog siya sa puwesto dili siya mokanaog.

Si Restauro midungag nga   ubos gihapon sa iyang pangalan ang tanang transaksiyon sa barangay.

Human sa pag-install kang Bucao ang grupo ni Restauro ang nagdungan og paniudto diha sa barangay hall gawas sa buhatan sa kapitan.