Duha ka mga batang tinun-an sa Grade 1 naangol human nabanggaan og motorsiklo sa dihang nanglabang sa karsada atol sa pagbukas sa klase didto sa barangay Balabagon, lungsod sa Moalboal, Cebu.
Si Insp. Rolly Lauron, hepe sa Moalboal Police Station nagkanayon nga naggunitay silang Crisa Marie Villasan, 6, Jessa Mae Bolo, 7, sa dihang nadasmagan sa motorsiklo nga gimaneho ni Allan Hernandez, 30, taga Candabong, lungsod sa Alcantara.
Si Jessa Mae nakabantay unta sa naghaguros nga dagan sa motorsiklo ni Hernandez hinungdan nga iyang gibira si Crisa Marie apan nabanggaan gyud kini.
Si Crisa Marie natumba ug nalatayan sa motorsiklo hinungdan sa pangos ug paso sa tambotso.
Tungod kay naggunitay ang duha, ang nawong ni Jessa Mae nabagnos sa karsada.
Pareho silang gidala sa Badian District Hospital, samtang si Hernandez mipasalig nga abagahon ang gastuhan sa ospital.