P8 plete giduso na’s LTFRB-7

Giduso sa Land Transportation Franchizing and Regulatory Board (LTFRB) 7 ngadto sa ulohan nilang buhatan ang minimum nga pletehan nga nagkantidad og P8 sa matag lima ka kilometro nga pagbiyahe.

Si LTFRB 7 regional director Romulo Bernardes miingon nga ang maong kantidad maoy consensus gikan sa mitambong nga mga sumasakay sa public hearing nga ilang gipasiugdahan.

Gitambongan ang maong public hearing sa mga drayber nga sakop sa nagkadaiyang kahugpongan sa Sugbu nga naglakip sa Cebu Integrated Trasport Services Cooperative (CITRASCO) Visayas United Transport Cooprative (VUDTRASCO) ug mga representante gikan sa nagkadaiyang ahensiya sa kagamhanan.

Ang CITRASCO ug mga kaubang kahugpongan sa mga drayber sa mga sakyanan nga pasaheroan sa Sugbu ang nagduso sa ilang minimum nga pletehan nga P2.50  nga usbaw.

Kun maoy kauyonan ang maong usbaw nga giduso sa mga drayber ang minimum nga pletehan  nga gikan sa P8.50 apan gisupak kini sa mga sumasakay sanglit lisud na kaayo ang pagsukli og 50 sentimos alang sa mga drayber.

Si Bernardes miingon nga ang bag-ong minimum nga pletehan nga naaprobahan sa public hearing ilang ipadala ngadto sa ulohan nilang buhatan kinsa maoy mihimo sa final approval.