Gipaabot ang one-on-one nilang Interior and Local Government Undersecretary for Special Concern Joselito Ruiz ug ni Kapitan Paz Radaza sa barangay Mactan alang sa 2010 nga eleksiyon pagka-mayor sa dakbayan sa Lapulapu.
Si Ruiz, bana ni Kongresista Nerissa Soon-Ruiz sa ika-unom nga distrito sa Sugbo, miangkon atol sa iyang pagduaw kang Kapitan Rufo Bering sa barangay Canjulao, Lapulapu nga adunay mga hugpong nga nagduso kaniya pagka-mayor sa maong dakbayan.
Ang luyo-luyong kalihim sa Department of Interior and Local Government miduaw ni Bering tungod sa reklamo sa usa ka sakop sa Sangguniang Kabataan nga naabot sa DILG-Manila.
Sumala pa ni Ruiz nga atol sa iyang pagsuroysuroy sa Lapulapu aron pagsusi sa mga suliran niini, daghan sa mga residente ang mihangyo kaniyang paatbangon sa ituboy sa administrasyon karon.
Matud pa hinuon niya nga sayo pa kaayo alang kaniya ang pagdesisyon ug hilabihan pa kasayo ang paghisgot og politika.
Apan ang mga tigpaniid sa politika sa siksto distrito nagkanayon nga dili posible ang pagdagan ni Usec. Ruiz sa Lapulapu tungod kay ang iyang kapikas nga si Kongresista Ruiz modagan man pagka-mayor sa dakbayan sa Mandaue.
Ang administrasyon karon sa Lapulapu naglaraw nga palansaron si Kapitan Radaza, nga kapikas ni Mayor Arturo Radaza kinsa anaa na sa katapusang termino karon hangtod sa 2010.
Si Kapitan Radaza nga nahinabi sa Banat News mikonpirmar nga siya'y iduso sa iyang mga kauban nga kapitan.
Matud pa hinuon niya nga wala pa siya'y desisyon mahitungod niini tungod kay layo pa ang eleksiyon.
Gawas kang Radaza ug Ruiz, wala pay politiko sa dakbayan sa Lapulapu nga mipadayag sa pagdagan pagka-mayor.