Susihon sa Office of the Ombudsman-Visayas ang paggamit sa Mactan Island Chamber of Commerce and Industry Philippines, Inc. (MICCIPI) sa official seal sa Ombudsman nga nakapatik sa letterhead sa maong kahugpongan sa mga negosyante sa dakbayan sa Lapulapu.
Si Deputy Ombudsman for the Visayas, Pelagio Apostol miingon sa dihang nahinabi sa Banat News nga walay kalibutan ang iyang buhatan sa paggamit sa logo o selyo sa Ombudsman sa MICCIPI tungod kay wala kini mananghid sa ilang buhatan.
Hinuon, miingon si Apostol nga usa ka accredited nga corruption prevention unit ang MICCIPI human sila miapil og seminar ug si Ombudsman Merceditas Guttierez mismo ang mipirma sa accreditation niini.
“Hindi puede na gagamitin nila ang logo pag-violate sa rights at pag-harass ng mga local at national officials,” si Apostol miingon, kinsa midugang nga wala hinuoy problema kun gamiton ang logo sa tinarong o maayo nga katuoyan.
“Kapag magkasiraan na, yun ang problema!” matud pa ni Apostol.
Ang sulat ni Pelaez gipadala ngadto ni Lapulapu city treasurer Elenita Catagcatag pagpadayag nga andam silang motabang sa Catch-A-Tax-Evader program sa kagamhanan sa dakbayan sa Lapulapu sa kondisyon nga unahon og utingkay ang mga kabtangan ni Mayor Arturo Radaza ug sa mga opisyal sa city hall.
Nagduda si Pelaez nga siya ug uban pa niyang suod ug mga kabus nga magbubuhis sa Lapulapu ang gitutokan sa kagamhanan kun masipyat pagbayad sa buhis.
Gihinganlan ni Pelaez ang mga pamilya kansang binayran sa buhis buot masayran sa MICCIPI nga nagbayaran ba sa hustong buhis, mao ang pamilyang Corro, Dimataga, Weigel, Dematera, Amores, Dignos, Malinguin, Anman ug Lito Osmeña.