Police asset gipatay samtang nahinanok

Patay ang usa ka police asset sa dihang gidul-itan kini sa pagpusil sa ulo samtang nahinanok sa pagkatulog sa usa ka lantay didto sa Sitio Sambagan, barangay Tabunok siyudad sa Talisay niadtong Sabado sa alas 9:30 sa gabii.

Ang biktima giila sa kapolisan nga si Woodles Labis, 25, ulitawo ug molupyo sa Campo-3, sakop sa nahisgutang siyudad.

Matud ni SPO3 Cleofas Bunjoc sa Talisay City Police Station sa  dihang nahinabi sa Banat News subay sa blotter niining gibasehan mibisita ang biktima sa pinuy-anan sa iyang igsuon sa maong lugar ug diha na matulog nianang pagkagabii.

Apan samtang nahinanok kini sa pagkatulog sa usa ka lantay nga kawayan nga nahimutang sa gawas nga bahin sa pinuy-anan kalit kining giduol sa suspek ug sa walay daghang estorya mideretso kini sa pagpamusil.

Ang biktima nakaangkon og samad pinusilan sa ulo nga milapos ang bala sa luyo nga bahin niini.

Human sa hitabo abtik nga misibat ang suspek ug sa dihang gisusi sa mga silingan ug tagtungod nakit-an nga naghigda gihapon sa lantay ang biktima nga nag-ubo ug nagkadugo ang ulo niini.

Gidali unta pagdala sa Talisay City District Hospital ang biktima apan gideklarar kini sa mga doktor nga dead on arrival (DOA).

Gidudahan sa mga silingan niini nga posibleng gikontrahan ang biktima sa iyang mga naligsan tungod sa pagsilbing asset niini sa kapolisan.