Giunay og pusil sa ig-agaw

Kritikal ang kahimtang sa usa ka batan-ong lalaki human kini giatngan ug giunay og pusil sa iya ra usab nga ig-agaw samtang gikan nga mitambong og disco didto sa barangay Abugon lungsod sa Sibonga niadtong Domingo sa alas 2 sa kaadlawon.

Ang biktima giila sa kapolisan nga si Joedy Malinao Rama, 22,  ulitawo ug molupyo sa nahisgutang lugar.

Samtang ang gitumbok nga suspek mao ra usab ang iyang ig-agaw nga si Jonas Apao,21, usa ka construction worker ug nagpuyo sa Sitio Baksije barangay Ocaña siyudad sa Carcar.

Matud ni SPO1 Ramuel Banugon sa Sibonga Police Station subay sa imbistigasyon niini nga  si Rama ug Apao nagkabingkil kini sa diskohan nga maoy gituohan nga sinugdanan sa maong kagubot.

Apan sa dihang paingon nang mopauli  si Rama kauban sa iyang ig-agaw nga lalaki giatangan kini  ni Apao nga armado sa wala matino nga kalibre sa pistola og gideretso sa pagpusil sa ulo nga bahin ug dayong sibat pahilayo.

Ang biktima gidali pagdala  sa tambalanan dinhi sa dakbayan sa Sugbo tungod sa seryosong samad pinusilan  sa ulo niini.

Padayon pang gi-imbestigar sa kapolisan ang maong panghitabo apan gituohan ni SPO1 Banugon nga may kalambigitan sa away-away sa magkaribal nga fraternity ang maong panghitabo.

Kini human iyang gihulagway nga nagdumot ug nagsige lang og away ang mga batan-on sa barangay Abugon, Sibonga batok sa laing grupo sa mga batan-on gikan sa Sitio Baksije barangay Ocaña siyudad sa Carcar sa mga milabay’ng bulan.