Nabulit sa mga samad pinusilan ang patay’ng lawas sa usa ka ex-convict sa dihang girakrakan kini og M-16 armalite rifle sa wala pa matumbok nga mamumuno didto sa bukirang bahin sa barangay Bae lungsod sa Sibonga, Cebu niadtong Sabado sa alas 8:30 sa gabii.
Ang biktima giila sa kapolisan nga si Mario Carillo, 45, minyo, usa ka mag-uuma ug nagpuyo sa maong dapit.
Gibutyag ni SPO1 Ramuel Banugon, imbestigador sa Sibonga Police Station sa dihang nahinabi sa Banat News nga paingon nga nagsubay sa gitugway niining mag-alanak nga kabaw si Carillo sa dihang gi-atngan kini sa suspek.
“Daghang samad sa lawas og tiil, medyo dunay kasuko siguro ang suspek kay sigun sa mga estorya estorya sa mga tawo didto hilabtanon man pud ning pamilyaha,” dugang asoy ni SPO1 Banugon.
Dili mominos 20 ka mga basiyo sa bala sa M-16 armalite rifle ang na-recover sa kapolisan paghiabot sa crime scene ug nakasibat na usab ang suspek o mga suspek.
“Apil maning biktima sa patay didto sa barangay Apo bukid na nga bahin sa Argao ug adtong miaging tuig lang nakagawas sa prisohan,” dugang asoy niya.
Matud ni SPO1 Banugon duha ka anggulo ang gisubay nila sa nagpadayon nga imbestigasyon nga motibo sa krimen ug kini mao ang posibling pagpanghilabot sa biktima sa mga kahayopan sa mga silingan niini o ba kaha ang nahitabong pagkalambigit niini sa patay nga nahitabo sa barangay Apo, lungsod sa Argao.
“Bisan ang kapitan mismo, Conie Padigos maoy mitumbok nga manghilabot og mga kahayopan sama sa manok ug mga kanding ang biktima pangawaton og pamutlan pa og ulo.”
Ang patay’ng lawas sa biktima kasamtangang gihaya sa Tupas Funeral Homes sa siyudad sa Carcar samtang gitakdang ipa-ubos sa autopsy.