Si Konsehal Diosdado Suico maoy gitudlong OIC mayor sa dakbayan sa Mandaue hulip ni Mayor Jonas Cortes kinsa atua karon sa gawas sa nasud sa iyang opisyal nga pagbiyahe.
Kini ang giluwatan nga pamahayag ni Konsehal Emiliano Rosal nga nahinabi sa Banat News kinsa miingon nga sa ilang regular session karong Miyerkules ang nagsunod nga konsehal nga si Alfonso Albaño Jr. maoy mohulip niini nga ilang presiding officer.
Gibase ni Rosal ang iyang pamahayag sa Republic Act 83 ubos sa rules and regulation alang sa Local Government Code of 1991.Matud pa ni Rosal nga ubos sa RA 7160 sa nasud kun wala diha ang gobernador, mayor, o bise mayor ang mosunod nga moasumer nga dili magkinahanglan pa og appointment sa mayor mao ang first councilor.
Si Rosal miingon nga alang sa paglikay sa mahimong kalapasan sa gipatuman nga Local Government Code sa nasud, ilang palingkuron si Albaño isip presiding officer sanglit si Suico mao man ang naglingkod isip mayor.
Sa nasayran nga si Cortes atua karon sa gawas sa nasud sa iyang opisyal nga biyahe ug dungan usab nga milarga sa pagtambong sa usa ka seminar nga gipasiugdahan sa US State Department si Bise Mayor Fortuna.