Gidakop ang usa ka dalaga human kini giingong mibayad og mini nga kwarta sa gi-order niyang beer sa usa ka KTV bar sa barangay Palanas lungsod sa Alcantara niadtong milabay’ng gabii.
Ang gidakop mao si Marebel Gunllen, 19, lumad nga taga Poblacion, Samboan.
Matud ni PO1 Noel Gabuya sa Alcantara Police dihang nahinabi sa Banat News ang cashier sa maong KTV bar nga si Locrecia Bocatcat maoy nidangop sa kapulisan human mamatikding peke ang gibayad nga P1,000 sa dalaga.
Si Gunllen dunay tulo ka mga barkadang lalaki nga kaubang nag-inom niadtong tungura apan human moorder og duha ka botelyang beer peke nga kwarta diay ang gipangbayad niini apan nianang pagkabuntag na madiskubrehing peke diay ang salaping iyang gibayad.
Pagkabuntag na nahibaw-an sa tagdumala sa KTV bar nga fake ang maong salapi ug nidangop dayon kini sa kapulisan hinungdan nga nasikop ang suspek nga kasamtangang nagpuyo sa barangay Candabong sakop sa maong lungsod.
Sumala pa ni PO1 Gabuya nangangkon ang kahera nga walay laing customer nga mibayad kaniya og P1,000 niadtong gabhiuna gawas lang kang Gunllen nga kaniadto nagtrabaho usab sa maong KTV bar.
Atol sa imbestigasyon sa kapulisan gikatahong miangkon ang suspek nga iyaha ang maong kwarta apan nipasalig nga bayran nalang ang nakuhang beer niini, midumili hinuon kini pagtug-an diin niya kini makuha.