Dumlog di “karera-free”

Si Kapitan Charles Basillote sa barangay Dumlog, dakbayan sa Talisay nagpanuko sa pagdeklara nga “karera free” ang iyang barangay tungod  kay nasayran niyang naa pay taga Dumlog nga  naghupot og moli-moli.

Matud pa ni Basillote nga may mga video karera sa iyang barangay nga iyang  gipasakmit sa kapolisan apan nagdumili gihapon siya sa pagtunol og sertipikasyon ngadto sa konseho aron tawgon nga “karera free” o wa nay karera ang iyang dapit kay wa pa siya kasiguro kun wa na ba gyuy karera ang Dumlog.

Kini tungod kay may nabati lang gihapon si Basillote nga mga taho nga matud pa dunay usa ka residente sa iyang barangay nga naghupot lang gihapon og moli-moli, usa ka klase sa de-makinang sugalan.

Ang laing hinungdan  nganong di siya kasiguro nga karera-free ang iyang barangay, kay matud pa ni Basillote puwerting kusoga sa hantak sa iyang lugar nga gipasiugdahan sa mga drayber sa traysikol ug traysikad.

Gani mikabat na sa 10 ka sugarol ang nadakpan ug 5 na  usab ka antogan ang gisakmit sa mga barangay tanod, matud pa ni Basillote.

Hinuon human mopirma og panaad nga di na sila mousab sa pagpanugal, gibuhian lang usab dayon ang maong mga dinakpan.