Gipangita pa karon sa kapolisan ang usa ka lalake kinsa nagselos sa iyang higala ug namusil kini niadtong miaging gabii sa sitio Lapyahan, barangay Labogon, dakbayan sa Mandaue.
Ang gipangita mao si Deque Caliza, 33, nga maoy suspetsado nga miluthang kang Richard Antizuela, 29 anyos, ulitawo nga iyang silingan sa Placer, Masbate.
Si PO1 Marino Lufranco nga nahinabi sa Banat News miingon nga migawas sa ilang panimalay ang biktima ug ang suspetsado unya kalit lang gipusil sa suspetsado ang biktima.
Human sa maong pagpamusil misibat dayon ang suspetsado ug gibiyaan ang biktima nga nahagba sa yuta.
Ang kapuyo nga babaye sa biktima midali pagdala sa naulahi ngadto sa Cortes General Hospital sa dakbayan sa Mandaue apan gibalhin kini sa Vicente Sotto Memorial Medical Center sa dakbayan sa Sugbo.
Si PO1 Lufranco miingon nga nakakita sila og usa ka slug sa bala sa dili pa matino ang kalibre niini.