100 punoan sa MJ giibot sa Badian

Usa ka gatus ka punoan sa Marijuana ang gipang-ibot sa kapulisan sa bukirang bahin sa sitio Canlurencio, barangay Patong lungsod sa Badian niadtong milabay’ng hapon.

Usa ka police asset nga gitago lang ang pangalan ang personal nga nitugyan sa buhatan sa kapulisan sa Badian kabahin sa mga punoan sa marijuana nga anihonon na.

Matod ni PO3 Jeremias Elardo sa Badian Police dihang nahinabi sa Banat News ang maong lugar maoy kinabukirang bahin sa ilang lungsod ug boundary na sa bukid sa lungsod sa Dalaguete.

Matod niya ang ilang police asset sa maong lugar nga nanginabuhi pagpangita og mga ornamental plants sa mga bukirang barangay ang nakadiskubre sa plantasyon sa marijuana.

Niadtong petsa 27 sa milabay’ng bulan sa Mayo mokabat sa 3,500 ka mga punoan sa marijuana ang nadiskubrehan ug gilarot sa kapulisan sa sitio Butong barangay Basiao sakop sa maong lungsod ug sikbit sa barangay Patong.

Ang mga gi-turn-over nga punoan sa marijuana kasamtangang gikustodiya sa kapulisan samtang nagpaabot sa direktiba gikan sa Cebu Police Provincial Office (CPPO).