Traysikol driver gipatay sa nagmotor

Gipusil patay ang usa ka drayber sa traysikol samtang namasahero sa tulo ka armadong lalaki nga luwan sa motorsiklo sa miaging alas 6 sa gabii diha sa barangay Canamokan lungsod sa Compostela.

Ang biktima giila nga si Mark Neil Remegio, 23, molupyo sa barangay Cogon Cruz dakbayan sa Danao.

Subay sa pasiunang pakisusi sa kapolisan ang biktima nagmaneho sa iyang traysikol apan dihay tulo ka mga wala mailhing lalaki sakay sa motorsiklo nga pulos nag-helmet ang nisabay kaniya.

Sa dihang nitapad ang drayber sa motorsiklo, usa sa duha ka angkas ang mibunot og wala matinong kalibre sa armas ug gipusil si Remegio diha sa tuong bahin sa lawas.

Ang mga residente sa lugar maoy nitabang ug gidala si Remegio sa Danao District hospital apan ang mga doktor nga miatiman mideklarar kaniya nga patay nang daan nga nahidangat sa nahisgutang tambalanan.

Si Insp. Vicente Velasquez, hepe sa Compostela police mitug-an sa mga tigbalita nga usa sa anggulong ilang gisubay, una mao ang panagbangi sa fraternity sanglit ang mga ginikanan nitug-an sa mga polis nga ang ilang anak miyembro sa fraternity apan wala kini mohingan kung unsa nga grupo.

Si SPO4 Ramerito Ramonida sa Danao Police nga nahinabi sa Banat News mitug-an nga niadto lang petsa 30 sa Mayo nakagawas sa prisohan ang biktima human misukol ug gipabilanggo sa amahan bali’g usa ka bulan.

Gawas niini, nagkanayon si Ramonida nga walay records sa ilang buhatan ang biktima apan nagtuo siya nga posibleng nalambigit kini sa panagbangi sa fraternity diha sa dakbayan sa Danao.