2 bata sa multicab natagak sa bung-aw

Duha ka batang managsuon ang kritikal ang kahimtang human mahagbong sa bung-aw ang multicab nga ilang gisakyan niadtong miaging adlaw didto sa Purok 2, barangay San Jose, ning dakbayan.

Ang duha ka mga bata nangasamad, napangos ug nabun-og ang kalawasan naila nga sila si Noel Amestoso Jr., 4 anyos ug manghod nga si Godwyne, 3 anyos.

Ang sakyanan gimaneho sa ilang amahan nga si Noel Amestoso Sr. 39, kinsa mao say midala kanila sa tambalanan.

Si Macario Magdadaro, molupyo sa naasoy’ng lugar nga nakasaksi sa hitabo nagkanayon nga samtang nag-parking ang multicab, mikana-og ang amahan aron sa pagkuha og bato aron ibangil sa ligid.

Apan kalit lang midagan ang multicab padulong sa bung-aw ug gituohang giduwaan ang kambiyo sa mga bata maong midagan kini.

Sa duha ka bata  si Noel maoy nagrabihan  tungod kay giingong nalaslas ang tuong dunggan niini ug gioperahan kagahapon.