Airman nitahan

Mitahan sa iyang kaugalingon ang retiradong sakop sa Philippine Air Force nga si Master Sergeant Nestor Bugarin nga gitumbok nga mipusil patay sa iyang ugangan ug bayaw ug miangol pa og laing duha diha sa barangay Apas niadtong milabay’ng semana.

Ang kapikas niining si Anecita, maoy nisuwat sa NBI alang sa iyang pagtahan nga penetsahan niadtong Hunyo 3.

 Usa ka team sa NBI agents pinanguluhan ni Special Investigator Arnel Pura miadto sa barangay Bitoon, Daanbantayan diin magpaabot si Bugarin ug pag-abot nila sa buhatan sa NBI boluntaryo kining mipailawom sa protective custody.

Si Bugarin miangkong mipusil patay sa iyang ugangang si Cristito Pontanar,72, ug bayaw nga si  Esmeraldo Pontanar, 43, niadtong milabay’ng Biyernes sa gabii samtang naangol usab sa maong insidente ang asawa ni Esmeraldo nga si Maria Glen ug anak niining si Paulo nga 13-anyos.

Apan kini miinsister nga ang iyang gihimo self-defense lang tungod kay si Esmeraldo maoy mihagit kaniya, gani ang insidente diha mahitabo mismo atubangan sa iyang balay.

Sumala pa niya nga nagsugod ang insidente tungod sa panaglalis sa iyang asawang si Anecita ug asawa ni Esmeraldo nga si Maria Glen, apan niabot si Esmeraldo ug giingong nagbitbit og armas ug nagpunay og singgit kaniya nga pagawson aron tapuson na ang tanan.

Matud pa niya wala una niya kini tagda apan dihang misuway na kini og sulod sa ilang balay diha na siya nakadesider nga kuhaon ang iyang armas ug gipusil si Esmeraldo.

Ang iyang ugangan gikatahong misagpa kaniya maong napugos usab siya og pusil niini, mao usab ang asawa ug anak ni Esmeraldo nga mibato ug misuway og puspos kaniya og tubo.

Human sa hitabo miadto siya sa Cordova una pa milarga padulong sa Daanbantayan.

Matud pa niya bisan wala pa siya’y warrant of arrest sa kasong two counts of murder ug two counts of frustrated murder iya nalang kining huwaton diha sa NBI.